ميعرفونه چنهم سدو الباب *** وفرشنه بزيبز ونمنا على التراب
كفيل تريد حتى لبيتك نفوت؟ *** و انا بطرگ الجناسي وخوف وثياب
يول اني الرمادي ام الدواوين *** منو بوكت الشدايد بيتي ما طاب؟
منو ما ضيفيته بذيچ الايام؟ *** وانا لمن بچيتوا اشگد دمع صاب
عوفوا اطفالنا خل ياكل الليل *** بيهم والصبح خل ياكل غراب
ولا تكفلونه غربه احنا وبعيدين *** وثلج كافلكم اني بعز شهر آب
و عيرونه لأن بينا الوكت دار *** ما مكفول حق الرد يالاحباب
طحنا وطيحة ابن الخير لو طاح *** چبيره بكبر دمعة وليل وحجاب
احچوا وسولفوا هو الوكت هيج *** ولكم مني كل ايات الاعجاب
أهي ظلت عليكم لا تسكتون *** ما اعتب لغيت حروف العتاب
شعتب على بزيبز لو اعتب ع الشيوخ؟ *** السوو ع الشرف والمرجله اضراب
شعتب ع السياسي لو على اشخاص *** فلا نعرف مواقعها من الاعراب
شعتب ع المحافظ؟ على كرحوت؟ *** العافوا شارع اهلي بنارهم شاب
الراحوا گعدوا بشارع الاميرات *** وعافوها الاميرة بين الذياب
يا صوفية عشگنا الدافيه شبيچ؟ *** انا لخاطر هواچ انطيت كم شاب؟
يا حي الاندلس شخبار البيوت؟ *** يا حي البكر يا الضباط ياطياب
يالاسكان مروا على البوفراج *** بس گوليلها بيناتنا عتاب
يا حي الشرطة يالجمهوري يالحوز *** ترا انذلينا والله بهذا المصاب
احن لمشية التأميم بالليل *** ومن نهر الفرات يمر هوا الهاب
احن للخمسه كيلو بوكت الغروب *** السكنوا بيها ناس اشراف الانساب
و احن هواي لسجارية الخير *** وعلى گاع الجزيرة اشگد امر حاب
احن لربعي للگعدات لليل *** لگازينوا الفرات للمت الاحباب
احن لشارع المستودع الراح *** يارب طالت علينه ايام الغياب